adel salib
blogger intersted in cinema and making movies
نــقــد فــيــلــم زهــايــمــر
أنتاج نوفمبر 2010
ينفع للى أكبر من 16 سنة
هنحرق القصة مش الأحداث (مضطرين للأسف
فيلم عادل امام، والحقيقة ماكنتش متشجع نهائي ... وخصوصا ان اعلانه نفسه مش مشجع، بس اللي شجعني عليه وجود فتحي عبد الوهاب لاني بحب تمثيله شخصيا.
البوستر : فيه بوسترين منهم واحد منقول نصا وصورة وكل شئ من بوستر فيلم لجاك نيكلسون زي ما مكتوب اهو
استسهال مع ان فيه 100 بني ادم لو فكروا ثواني هيجيبوا افكار محصلتش
القصة : محمود شعيب (عادل امام) بيصحي من النوم بيكتشف انه عنده زهايمر، وهو متأكد انه معندوش، وكل الناس اللي بيخدموه هو ميعرفهومش.
الاحداث بتتكرر يوميا، وكل اللي يعرفهم بياكدوله انه مصاب بالزهايمر من سنتين ومش فاكر اي شئ .. مش فاكر غير اصحابه (احمد راتب و سعيد صالح) و اولاده (فتحي عبد الوهاب و احمد رزق) ... فبيروح لصاحبه احمد راتب اللى بياكد له انه فعلا مصاب بالزهايمر، ولما بيروح لسعيدصالح بيلاقيه هو نفسه مصاب بالزهايمر (بدون حرق ... ده افضل مشهد في الفيلم كله).
وده نصف الفيلم الدرامي اللى بيتخلله بعض الكوميديا، بتحايل عادل امام علي الدكتور او الممرضة عشان يخرج ويسيب البيت.
النص التاني : عادل امام الاب بيكتشف ان ولاده رافعين فضية حجر عليه عشان مديونين للبنك وعاوزين يسددوا وهو رافض يسلفهم، فبيتفقوا مع كل البشر، حتي صاحبه اللي بقي شريكهم، انهم يخدعوه لحد ما يصدق انه مصاب بالزهايمر وبيدوله دوا بيخليه عنده نفس الاعراض تقريبا، فبيقرر يربي ولاده من اول جديد ... وهنا شوية كوميديا بقي ...
طبعا مش هاقول النهاية لانها فيلم عربي زيادة عن اللزوم والجمهور عاوز كده
نادر صلاح الدين (السيناريو ):
القصة نفسها حلوة بس ركزت علي قصة "تاكل مع الناس"، وسيبت قصة اهم.
يعني اعتقد التركيز علي قصة سعيد صالح لوحدها تعمل فيلم درامي محترم قوي ... صحيح نكد بس مين قال اني محتاج اشوف عادل امام طول الوقت فى كوميدي، خصوصا ان كل الناس دلوقتي عاجبها قوي كوميديا حلمي ومكي والثلاثي (شكيو وهشام وفهمي) اللي هي لايقة قوي علينا.
لكن هضحك علي افيهات عادل امام و حركات وشه والكلام ده صعب ... بس مانكرش ان فيه شوية حاجات لذيذة في القصة، بس اعتقد انه كان ممكن يبقي عمل اهم بكتير من مجرد فيلم للعيد.
الشخصيات مافيهاش اي عمق او اهتمام سوي بالشخصية الرئيسية، و دور زي دور نيللي كريم كان ممكن يبقي اقوي من كده، وكذلك شخصية فتحي عبد الوهاب اللي ما انقذهاش غير اداؤه
.
عمرو عرفة (الأخراج) :
انا شخصيا عاجبني قوي الفيلم اخراجيا، وعاجبني اكتر الاهداء اللي اتكتب في الاول لصلاح مرعي (مهندس الديكور) ... اللي الصراحة يستاهل عن الفيلم ده 100 اهداء مش واحد بس، هو و صورة محسن احمد عملوا رؤية حلوة قوي خصوصا في لبنان ... بس كان فيه كادرات كتيره متحركة يمين وشمال، حسيتها استعراض زيادة عن اللزوم ...او ملأ فراغات.
التمثيل
:
طقم الممثيلن المساعدين الحقيقة كانوا جامدين قوي (ضياء المرغني- يوسف عيد – ايمان السيد) و الاخيرة دي عاملة دور كبير مش مجرد ظهور ... و هى الحقيقة قمة في الكوميديا.
احمد راتب : العادي ... قوي
لطفي لبيب : شرحه ...عادي بزيادة
نيللي كريم : دور صغير وعادي ... اعتقد عشان بس مع عادل امام
رانيا يوسف : مافهمتش ايه علاقة ده بالتمثيل !!!!
احمد رزق : دور عادي ... اللهم مشهدين قصاد عادل امام، هو بيختلق الكوميديا وانت بتكمل.
عادل امام : لحد نص الفيلم كنت مستمتع، وحسيت ان هو ده عادل امام اللي عاوز اشوفه ... بيعمل افلام ماشية مع سنه وموضوعات قوية. بس النص التاني قفلني قوي.
فتحي عبد الوهاب : اداء لذيذ بعيدا عن ضعف الشخصية في السيناريو، وماتخيلتش يبقي فيه كوميديا ... بس الحقيقة حلو قوي .. الا بس مشهد الضحك اللي في البانيو كان باين قوي انك بتضحك بجد.
سعيد صالح : مشهد بالفيلم كله ... فينك بقي ياعم ؟؟ الممثل الكويس لو مشهد واحد بيبان، وانت بمشهد عملت فيلم بحاله ... رائع واكثر من رائع
.
الفيلم مقبول ... يعني 5/10
مايضرش تشوفه، بس مرة مش اكتر ... هتستمتع لانه افضل كتير قوي من افلام عادل امام الاخيرة، خصوصا الفيلم الاسطوري بوبوس.
Eat Pray Love
القصة : كاتبة اسمها (ليز) بنشوفها في زيارة لـ(بالي)، وقاعدة مع طبيب قروي من اللي بيقروا الكف دول ... وبيقولها انها هتيجي تزوره بعد سنة تقريبا بعد ماتخسر كل فلوسها وحياتها تبوظ، بس هتيجي عشان تعلمه انجليزي وهو هيعملها كل شئ في الحياة يعرفه !!
بترجع وبعد وقت بتطلب الطلاق من جوزها، اللي، زي اي زوجين عادين، فيه بينهم اختلافات ومشاكل وعادي ... بس بتصمم وجوزها بيعيط وبيقولها بحبك وهي ولا الهوا، و بتقوله لا انت مش مهتم
اول مكان بتروحه ايطاليا : بتتعلم ازاي تستمع بالحياة والاكل، وازاي تستمع بكل حاجة او بمبدأ الـ(ولا اي حاجة) يعني انك ماتعملش اي حاجة ... وده مبدأ ايطالي اشبة بالمصريين اللي ماشيين بمبدأ فوت علينا بكرة، وده بيتثبت ان الطلاينة فعلا مصريين اوروبا.
وهوب راحت على بالي، ورجعت للطبيب القروي ده وعرفها ... وسابها تنطلق. واتعرفت هناك علي (خافير بارديم/فيليب) المطلق زيها، وشوية بيتخانقوا وبعد كده يتصالحوا ... وفي نفس الوقت بتتعرف علي ست قروية وبتصاحبها هي وبنتها.
هي دي تقريبا معظم القصة بدون تفاصيل دقيقة او كشف للنهاية
الفيلم ده هينقل مخرجه من العمل التلفزيوني للسينما بشكل اكبر ... كفاية انه كان معاه جوليا وخافير وطاقم تمثيل حلو قوي الصراحة وده اللي جايله بقي فى الكلام دلوقتى ..
التمثيل :
Javier Bardem
هو حبيبي قوي ومن اقوي الممثلين علي الساحة، ومنتظر كمان فيلمه الجديد ... بس الحقيقة مش بالع خالص الدور اللي عمله ده ... تمثيل عادي قوي وحسيته عمله مجاملة وبرضه اسمه اشتغل مع جوليا.
Richard Jenkins
Hadi Subiyanto:
Julia Roberts :
الفيلم تقيمة 5/10 وانا بديله 4/10 و شايف ان حسن النية ماتعملش فيلم كويس ..
The Social Network review
الفيلم مكنش محتاج تشجيع هو صحيح اخراج ديفيد فينشر وده كفيل اني اشوف الفيلم وانا مغمض بس اصلا الفيلم بيدور حول الشئ اللي قلب دماغ العالم الفترة اللي فاتت اللي هو الفيس بوك سواء كنت بتحب الفيس او لا هتشوف الفيلم وده طبيعي قوي .
القصة : ازاي وليه مارك زاكيربيرج عمل الفيس وازاي ابتدي من مجرد موقع لجمع صور بنات هارفرد ثم التعرف لموقع في كل انحاء العالم
وبيمر بالناس اللي قلبهم في الفكرة او اللي هما قالوا عنه كده واصحابه اللي سابهم او اللي فضلوا معاه كل ده بيقطعه جلسات شبة قضية بينه وبين اصحاب الفكرة وصاحبه اللي ساعده بالفلوس وسحب منه نسبته في الشركة بعد كده
الفيلم بالنسبة ليا معرفتش احدد هو حلو ولا لا لكذا سبب اهمهم اني من اول مشهد مكنتش متعاطف مع مارك نهائي لانه ببساطه كان طالع في الفيلم وغد(حسب ترجمة انيس عبيد) يعني بارتباكه وقلة خبرته البنت اللي اعجب بيها سبته في اول مشهد راح فضحها فضيحة تمام علي البلوج بتاعه وبعدين راح عمل هاك علي سيرفر الجامعة وقعه وبعدين التؤام اقترحوا عليه موقع راح معدل الفكر وعمل الفيس بوك ونفضلهم وحتي صاحبه الي ساعده بفلوس حلقله صح
طبعا في الاخر بيقول انه عمل تسويه بمبالغ عملاقة بس مكتبوش صاحبه اللي ساعده ده اللي كان ليه في الاصل 30% اتراضي بكام اعتقد بمبالغ متتكبش
وعادي بالنسبة لابو مارك اصغر بليونير في الارض
طيب شخصية زي دي (وانا العادي بحب افلام السيرة الذاتية) هاخده مثل او اتعاطف معاها ليه ؟
انا محبتش الشخصية نهائي بالعكس كرهتها اكتر وكرهت ردود افعاله بعد الفيلم انه معلقش وراح اتبرح بـ500 مليون تقريبا للمدارس قبل الفيلم ماينزل بمفيش
هل تحسين صورة يعني ولا ايه مش فاهم
ولما اتسال علي الفيلم قالهم هو فيلم خيالي لذيذ :)
في جملة اتقالته من بنت في اخر مشهد لخصت الموضوع بجد
u r not an asshole...but u r trying so hard to be that
ترجمة انيس عبيد : انت ليس وغد ولكن تحاول جاهدا ان تكون كذلك
بس مع شوبة تفكير برضه هنلاقي ان الاختراع ده فعلا اثر البشر بدرجة رهيبة لدرجة ان نص المعلومات اللي عرفتها عن الفيلم كانت من الفيس بوك نفسه سواء بلينكات متشيرة او بصور او حتي اني اعجب بالفيلم اللي ليه صفحات كتير رغم اختلافه مع صاحب الموقع نفسه
خلاني اسال ايه الشخصية الغريبة اللي قدرت تجمع كل البشر دي وتعرف اهتماتهم وتحدث نفسها وتفضل علي القمة والموقع اللي ابتدي بـ 2000 دولار اتعرض ملايين ويمكن مليارت لبيعه او حتي نسبة فيه ومع ذلك بيرفض لانه اساسا بيجبهم بيجبهم
we lived in farms ,then we lived in cities,now we gonna live in the internet
عيشنا في مزارع وبعد كده في مدن دلوقتي هنعيش علي الانترنت
اعتقد سبب كافي ان واحد من قلة قليلة بقيت من اباطرة الشبكة دي بتعمل عنه فيلم حتي لو فعلا (وغد)!!
السيناريو متاخد من كتاب اصلا بيحكي قصة الفيس بوك
Aaron Sorkin
السيناريو الحقيقة كان بطئ في الساعة الاولي ويمكن ساعات ممل بس يمكن محاولات فينشر انقذت الموضوع شويتين
بس يمكن لان القصة نفسها احداثها مش بالاثارة اللي كنت متصورها
David Fincher
الاخراج : من مخرجين المفضلين ومؤمن تماما ان الراجل ده مش بيحط ايديه في فيلم الا وهو عارف ومتأكد ان الفيلم ده يستاهل لانه عدي مرحلة السبوبة من زمان
الفيلم اخراجيا حلو قوي واختيار طقم ممثلين في الجون من الاخر
التمثيل :
Jesse Eisenberg
الوغد مارك ... والحقيقة هو كان في الفيلم رائع تمثيلا وحتي اللقطات اللي الواحد بيحاول بيتعاطف معاه كانت حلوة بس انا مقدرتش
Andrew Garfield
سافرين (صاحبه والممول الاول للفيس بوك) تقريبا الممثل الوحيد الجيد كتمثيل وشخصية اتعاطف معاها بشكل ما وهو مع فينشر صبروني اكمل للاخر
الفيلم واخد تقييم 8.4/10 وفي المركز 112 . انا بدليه 6.5/10 وهو فيلم يتشاف اكيد بس الحقيقة برضه انا لسه محتار ازاي اتعاطف مع (وغد) ؟؟
The American
- فيلم كلوني الجديد وده سبب يكفيني انا شخصيا اني اشوف الفيلم و خصوصا انه بعد فيلمه الرائع
Up in the air والحقيقة مكنتش متفائل بالفيلم من الاعلان وخصوصا ان الفيلم متصنف اكشن – اثارة – دراما – جريمة ... فالواحد مبقاش عارف هو ايه نظامه
وكمان البوستر الاصفر القديم ده علي قد ماشدني قوي قوي بس خفت ليكون فيلم تسعيناتي زي افلام سلفستر و رودريجز اللي رجعتنا لافلام الفيديو تاني
The Expendables & Machete
- القصة : البداية خارج كلوني من بيت جليدي مع مزة بس مشهد حب بينهم وبيحولوا يغتالوا فبيهرب وببساطة بيقتل البنت اللي معاه وبيهرب وبيقابل واحد (انت مش فاهم هو جورج كلوني شغلته ايه لحد دلوقتي) ... بيقولوه علي بلد في ايطاليا بيهرب لها لحد مايكلمه وياريت مايتعرفش علي حد وميصحبش حد وفعلا بيروح وبيفضل يلف و يدور وبيروح بس بيت للعاهرات و بيتعرف علي بنت هناك عشان يقضي وقته وفي نفس الوقت بتجي بنت مرسال من رئيسه في الشغل و بنكتشف ان كلوني صانع اسلحة مش اكتر
مع الوقت بيتعرف علي البلد وكاهن المدينة بيتعرف عليه وبيصاحبه بس مش صداقة هي تحسه جلسة اعتراف غامضة من الطرفين
وفي النص بيظهر شخص غامض يبعتله جزء من جرنال في حادثة القناص و البنت اللي اتقالت في اول الفيلم وبس ... (الجزء ده عبقري و مش هاحرقه)
كلوني ضايع بين عدم استقرار ووحدة و زي ما اتقال في الفيلم
هو رجل الفراشات (طور الانقراض)
- السيناريو و الحوار
الفيلم مقتبس من رواية لـ
Martin Booth
ومش هاقدر احكم علي الرواية نفسها بس الموضوع مكتوب بشكل نفسي رائع مش مجرد اكشن او اي شئ من ده
Rowan Joffe
كاتب السيناريو وهنا نبص لكذا نقطة ... اولهم الرواية والموضوع اللي كان ممكن يبقي اكشن بس اتعمل بنضافة
تانيهم البداية الخيالية اللي تقريبا من افضل البدايات اللي ممكن اكون شفتها
يعني لما قريت عن السيناريو من الحاجات اللي اتعلمتها عن السيناريو الجيد ان اول دقيقتين (اول مشهدين فيه) يشدوا المشاهد
معتقدتش في شد للمشاهد اد ان واحد وبنت (هتفتكرها حبيبته) وفجاة يقتلها بعد ما دافع عنها !!!
مشهد النهاية اللي المفروض متوقع قوي قوي .... بس يجي ازاي ده ؟ كل ما ااقول خلاص الاقي نقلة تانية وتالتة بشكل خلاني فضل مستني بعد التتيرات ليكون هيجيب مشهد تاني ولا حاجة
- الاخراج :
- Anton Corbijn
تاني فيلم ليه بس كان ليه في التسجيلي و الفيديوهات بس الحقيقة حسيت انه بقاله 100 سنة وعارف كويس الورق اللي تحت ايده وازاي يعمل فيلم كويس قوي ... الفيلم حلو قوي وطقم تمثيل عالي
مناظر حلوة قوي بس حسيت انه كان ممكن يلعب فيها اشد من كده وكان ممكن يخلي الفيلم بقوة فيلم
Up in the air
بس هو مع ذلك فيلم عظيم جدا
بس من اللقطات اللي معجبتنيش في النهاية المواجهة بين كلوني و رئيسه كانت عبيطة حبتين معدلهاش الا اداء كلوني كالعادة
- Herbert Grönemeyer
الراجل بتاع المزيكا هو الماني و شغله قليل بس عامل مزيكا عبقرية بمعني الكلمة والاغاني حتي اللي اتحط في الخلفية مختارنيها بشكل جامد قوي
يعني كلوني كان البنت بتقوله انه راجل الفراشات فكان بيجي في الخلفية اغنية مادونا
Madama Butterfly
وكمان اغنية
Tu Vuò Fà L'americano
ودي في خلفية مشهد كان هيتكشف فيه !!! المشهد ده عبقري بشكل مش معقول مع ان الاغنية فرايحي قوي والجو متوتر قوي ومشحون بس تقريبا مفيش اختيار اصيع من ده
التمثيل : طقم اغلبه ايطالي تقريبا
Paolo Bonacelli
الكاهن : شخصية غامضة متفرقش عن البطل كتير ساعات كنت بحس ان ده ممكن يمشي شرير الفيلم بس مش شر مؤذي بس نقيض البطل ظاهريا وداخليا ميفرقش عنه كتير
اداء رائع جدا
Thekla Reuten
دي القناصة اللي بتطلب منه السلاح ... شخصية مشابه ليه قوي بس كبنت اعتقد كنت عاوز مشهدين تاني ليه ...شخصية تشد قوي و اداء معقول من الممثلة
Violante Placido
كارلا البنت اللي هيتعرف عليها وهيحبها اكيد ورغم انه نص الفيلم قالعة ومش بتعمل مشاهد بمعني الكلمة بس هو دورها كان اعمق قوي في ردود افعال كلوني
هي مزة الصراحة ببس مش حاسسها ممثلة فظيعة
George Clooney
عم الشباب ... كانت فاكر الفيلم ده هيكون شباك تذاكر زي العادة فيلم قوي قوي وبعده فيلم ولا اتنين للتذاكر بس الصراحة انبسطت جدا بالفيلم
الراجل ده خسارة انه ميخدش اوسكار تاني بس اعتقد الترشيح لازم علي الدور ده
الراجل ده قادر علي توصيل احاسيس كتيرة و غريبة ببساطة متناهية
- الفيلم واخد 6.8/10 وانا بديله 7.5/10 بس هو اللي هيشوفه في السينما عندنا ميضرش بس يشوف النسخة الديفيدي لان هيفوته مشاهد كتير هتتشال هي صحيح هتبان انها جنسية بس ... بس هي مهمة قوي فرؤايتك لبطل الفيلم واحساس الخوف والرهبة اللي ملازمة اغلب الوقت حتي في الاوقات الحميمة دي .